ന്യൂയോർക്ക്: ഐബിഎം ഓഹരികൾ കഴിഞ്ഞ 25 വർഷത്തിനിടയിലെ ഏറ്റവും വലിയ ഏകദിന തകർച്ചയാണ് തിങ്കളാഴ്ച നേരിട്ടത്.
ഐബിഎമ്മിന്റെ പ്രധാന വരുമാന സ്രോതസായ മെയിൻഫ്രെയിം ബിസിനസിൽ ഉപയോഗിക്കുന്ന പതിറ്റാണ്ടുകൾ പഴക്കമുള്ള കോബോൾ പ്രോഗ്രാമിംഗ് ഭാഷയെ ആധുനികവത്കരിക്കാൻ തങ്ങളുടെ ’ക്ലോഡ് കോഡ്’ എന്ന എഐ ടൂളിന് സാധിക്കുമെന്ന് ആർട്ടിഫിഷൽ ഇന്റലിജൻസ് സ്റ്റാർട്ടപ്പായ ആന്ത്രോപിക് പ്രഖ്യാപിച്ചതാണ് ഇതിന് കാരണമായത്.
ഇതേത്തുടർന്ന് ഐബിഎം ഓഹരികൾ 13.2% ഇടിഞ്ഞ് 223.35 ഡോളറിൽ ക്ലോസ് ചെയ്തു. ഇത് കന്പനിയുടെ വിപണിമൂല്യത്തിൽ ഏകദേശം 40 ബില്യണ് ഡോളറിന്റെ കുറവുണ്ടാക്കി. ഈ വർഷം ഇതുവരെയുള്ള ഓഹരി മൂല്യത്തിൽ 24 ശതമാനത്തിലധികം ഇടിവ് രേഖപ്പെടുത്തി.
ആന്ത്രോപിക് പുറത്തുവിട്ട ഒരു ബ്ലോഗ് പോസ്റ്റാണ് കൂട്ടത്തോടെയുള്ള ഓഹരി വില്പനയ്ക്ക് കാരണമായത്. കന്പനികൾക്ക് വലിയ ചെലവും സമയവും നഷ്ടപ്പെടുത്തിയിരുന്ന കോബോൾ ആധുനികവത്കരണ പ്രക്രിയയിലെ ഗവേഷണവും വിശകലനവും എളുപ്പത്തിൽ കൈകാര്യം ചെയ്യാൻ തങ്ങളുടെ ’ക്ലോഡ് കോഡ്’ എന്ന എഐ ടൂളിന് സാധിക്കുമെന്ന് ആന്ത്രോപിക് അവകാശപ്പെട്ടു.
മുൻപ് വർഷങ്ങളോളം നീണ്ടുനിൽക്കുന്നതും ധാരാളം കണ്സൾട്ടന്റുമാരുടെ സഹായം ആവശ്യമുള്ളതുമായ ഇത്തരം പ്രോജക്റ്റുകൾ, എഐ ടൂളുകൾ ഉപയോഗിച്ച് വെറും മാസങ്ങൾക്കുള്ളിൽ പൂർത്തിയാക്കാൻ കഴിയുമെന്ന് കന്പനി വാദിക്കുന്നു.
Deepika
E-paper LOGIN
LOGIN
